• Litt om og men
• Oversikt over plager og naturmiddel

Litt om og men

Mellom "farlig, farlig" og trygt og godt

Å prøve sjølv kan vere farlig. Men det kan også ende kjekt.

Ein skal vite kva ein gjer, stort sett. Viss ikkje får ein vere varsam, og heller alliert med gjengs kunnskap.

1. Det kan hjelpe å tvile seg fram – vitskapelege metodar er tviling sett i system, på sett og vis. Framgangsmåtane hjelper fram funn – då har ein "tvilt i veg" til ein ser eitkvart ved hjelp av massive statistiske utrekningar og anna som kan høve. Så ein farbar veg er å tvile og sjå.

2. Ein annan er å kvile mens andre forskar fram data.

3. Ein tredje er å prøve og sjå sjølv – då er nokon forsøkskanin, meir eller mindre. Å prøve sjølv kan vere farlig og kanskje ikkje billig heller, og somme bøter med livet for innsatsen, til dømes soppsankarar som ikkje har sett seg inn i kva grenser det kan vere best å halde seg innafor og kva for soppar ein ikkje skal ete, og kva for soppar dei liknar, og så bortetter. Så det går ikkje alltid bra for den som ikkje får med seg det som er offentleg godteken lærdom. Det er jamt klokt å sjekke slikt først, sia det kan bli trist for dei som vil eksperimentere uklokt.

Mange kombinerer frå dei tre tilnærmingane ovafor. Plantemedisin kan altså invitere til fleire slags tilnærmingar, og slett ikkje alle er like forsvarlege. Tre av hovudstrategiane er rissa opp kort ovafor.

Ein utprøvar skal vite det kan ta slektsledd (generasjonar) å vinne lærdom nok til å forholde seg klokt til plantar og urter og medisinar like eins. Det heng mellom anna slik saman:

• Somme biverknader dukkar fram i arvestoffet etter kvart, som det gjorde for det fostermisdannande thalidomide. Middelet var dobbelblind-testa (strengt testa) for korttidsverknader, men ikkje for langtidsverknader på arvestoffet.
• Somme biverknader kjem fram i samvirke (synergi) med anna – andre plantar, medisinar.
• Somme verknader heng saman med korleis middela blir prosesserte – dyrkingsmåte, tillaging, oppbevaring kan vere nemnde. Til dømes blir potetknollar som får godt med sollys på seg, grøne og så giftige at bitte små barn godt kan bli uvel av dei.

Innsanka erfaringar over mange hundre år kan vere tiltrengt for å vite kva for mat, plantar og urter som er godt og trygt å innta, i kva for mengder, og korleis det må lagast i stand, og når på året. Dyrkingsforholda spelar også inn med plantevernmiddel og forringande måtar å dyrke jorda på.

Eit døme: Blåskjel blir dyrka i norske fjordar sørpå og vestpå. Men blåskjel kan vere spesielt giftig mellom april og august i sær, og dessutan resten av året. Giftige blåskjel kan føre til minnetap, lammingar og død. Streng kontroll må til. [1]

Anna må også med: Mykje kjem an på kor forgifta fjordvatnet eller jordsmonnet eller lufta kan vere. Heile 34 norske fjordar er forgifta; ein blir rådd ifrå å ete fisk, skaldyr eller fiskemat frå dei. Giftene som er mest framme er kvikksølv, PCB, kadmium og bly. Slikt sjøvatn finn ein frå Oslo i søraust til Hammerfest i nord. [◦NRK, 8 juli 2007]

Alliert med oppsamla kunnskap

Kva for plantar kan hjelpe mot (og for) kva? Det finst mange bøker i handelen om desse tinga. Og nedafor står ei liste over litt av kvart. Lista er ikkje komplett, verken på den eine eller andre måten. Ved botnen av sida står det opplista plantebøker og urtebøker. Heller ikkje den er komplett og oppdatert no lenger.

Ingen data på denne sida får fortrengje og erstatte medisinsk sjekking og behandling. Dei som treng medisinsk undersøking og oppfølging, treng å oppsøke kvalifiserte behandlarar.

Somme finn seg tent med urter av ulike slag, brukt på ulike måtar, mot litt av kvart forskjellig. Mykje kjem nok an på kva for plager det er og kor langt dei vel har komme. Noko kjem også an på kva for urter ein går inn for, kvaliteten deira, og noko kjem an på lagringa, tillagingsmåtane, doseringane, og så vidare.

Det er mykje å ta omsyn til. På neste side står plantebaserte middel. Der står somt som kan vere med og forklare utvalet på denne her sida. Det ligg ingen tilrådingar i lista, den skal ikkje oppfattast som meir enn ei pedagogisk syning; den har bakgrunn i plantetradisjon og mange nyare medisinske funn. Ein veit heller ikkje så mykje om korleis mange plantar verkar.

Reservasjonar A

Kva figur 1 syner -

Figur 1: Farar ved urtemedisin blir vikla fram

MIDDEL (URTER): Verknaden av middel (her: urter) er synt som ei gulfarga ellipse. Eg gir den høgredreiing (pila) for å syne at dei hjelper i retning av tilfrisking, altså betring.

PLAGER: Det som er farga grønt kan vere plager ein går til komplementær (alternativ) behandlar med. Vi kan her tenkje oss ei annleis slags dreiing i skjol – eit plagekompleks har altså fått venstredreiing. Somme plager har stemningar knytt til seg – depresjonar kan komme av andre ting, til dømes. I så fall og i den grad dette er tilfelle, er depresjonane kanskje ikkje hovudårsaken, men meir som symptom å rekne. Det er godt kjent.

Det er naturlegvis verdt å sondere mellom ganske overflatiske plager (delane av symptombiletet ein kan merke og fatte) og djupare feilverksemder involvert i ånd og organisme – og som vel kan vere involvert, dei også, i lag med dei symptoma som er lettare å nå i: Når legar kryss-sjekkar symptom for å danne seg eit symptombilete og finne nærare ut av kva for sjukdommar som vel kan vere involverte, set dei saman puslespelbitar og kjem fram til namn på sjukdommar. Slik er det ofte. Moderne legebøker har plansjar med løyper som hjelper vanleg folk å gjennomføre liknande sjekkingar. [jf Fam]

BAKGRUNN: (1) På figur 1 er det feltet der ein kan vere bevisst, farga blått. Det står øvst. Der ein er ubevisst, er feltet brunaktig. Merksemdhorisonten til den enkelte ligg imellom som ein vassrett strek. (2) Ein kan også vere uklart medviten om somme av plagene – det er ikkje synt i detalj på figuren, men symptom som ein kan merke uklart, ullent, ikkje tilrekkeleg klart, er det mogeleg å fatte når ein blir fortalt om dei. Du kan tenkje deg dei står kloss under medvetthorisonten (det er grenselinja mellom bevisst og ubevisst) – litt nedi det brune feltet.

PÅVERKNADER, INTERAKSJONAR: Dersom middelet eller midla når fram (inn) til plagene og "skubbar dei vekk" meir eller mindre, heilt eller delvis, for kortare eller lenger tid eller varig, er det gagn i det middelet, seier ein truleg. Her kjem faktisk mange reservasjonar til:

RESERVASJONANE: Ikkje gamble: få lege til å diagnostisere deg o.a. - sjølv om du driv med sjølvhjelp og eigenomsorg – det er jamt tryggast. Ikkje kast vrak på legeordinert, nødvendig medisin fordi du har lindring og/eller tilfrisking (desse tinga kan bli kortvarige og ta slutt – kva då?) av midla. Pass på at du ikkje forkludrar verknader av legeordinerte middel med anna; ein må kunne mykje for å drive sjølvhjelp forsvarleg.

Figur 2: Om utilstrekkeleg betring

Figur 2: Farar ved urtemedisin må ein tenkje gjennom.

Det neste eg kjem til, er dei tilfella der midla faktisk hjelper, og fjernar mange symptom ein vel kan vere merksam på. Kva då? I tillegg til det observerte faktumet at mange alternative middel ikkje gir varig betring eller varig tilfrisking, er det også slik at hjelpa mange gonger ikkje er fullgod og fullt dekkjande hjelp heller.

Sett at dei plagene som er del av eit større eller mindre plagekompleks (sjukdom), blir fjerna ved gamle og nye alternative middel. Då risikerer ein iallfall teoretisk at dei djupare delane av ein sjukdom ikkje blir behandla, men "grev seg fast" utafor merksemda (utafor det ein er merksam på), fordi "ganske supre middel" fjerna dei plagene ein fatta.

I slike tilfelle kan djupe problem gå ubehandla, gå seg til, og bli farlege, også til å døy av med stunder – det kan tenkjast. Dermed forstår nok mang ein rådet om å karre seg til lege og få kyndig diagnose og hjelp snarast råd – først av alt.

Reservasjonar B – Mykje får ein finne ut av sjølv i dette

Med ting som dette i bakhovudet kan ein mang ein gong freiste å hjelpe seg sjølv med alternative remedium. Det finst mange av dei. Lista under er gjennomsett av naturlege, men ein får makte å gå til litteraturen for å finne ut kva for plantedelar som kan nyttast, og i kva mengder, kor lenge, og kva for eventuelle farar det er med somme av urtene; nokre er giftige i større konsentrasjonar, og nokre blir giftige om ein tek dei over (for) lang tid. Slikt må ein finne ut av sjølv.

Blant litteraturen under kan eg vel tilrå Familielegen 1 og 2 (Familieläkaren i norsk utgåve), Nutrition Almanac, David Hoffman si urtebok, Bruset og Tveiten si enkle, greie Helse på grønn resept og William Thomson si Medisinske urter: Naturens legende planter. Det finst også andre bøker med interessante opplysningar.

Merk og hugs – dette er "eine grausame Salbe"!

(1) Ved alvorlege sjukdomstilfelle er det ikkje noko som får erstatte profesjonell medisinsk hjelp. Bøker med alternative kurar gir mange plantereseptar og forklaringar som kan gi hjelp og supplement til legebehandlinga. Eksperimenter aldri på eiga hand, slett ikkje med giftige plantar. Ein gjer vel i å sjekke føreåt.

(2) Oversikta her er verken uttømmande eller forpliktande. Ein viktig grunn: Den enkelte brukar kan reagere individuelt og også individuelt allergisk på nesten kva som helst for tida. Og så er det også det at somme plantar kan verke forgiftande dersom dei blir inntekne eller brukast i store mengder eller over lengre tid. – Uvel? Bortsett frå når ein kjenner seg uvel berre i mindre grad, bør ein alltid oppsøkje lege eller anna fagpersonell. Om ein kjenner seg mykje uvel etter inntak av plantar, skal ein til lege. Og ein skal støtt koordinere bruken av urter med legen i fall ein allereie blir behandla for ein sjukdom, i og med at somme urter kan vere farlege om dei blir nytta som legemiddel [sjå McHoy og Westland, s. 4].

(3) Ved urtebasert sjølvbehandling mot sjukdom og lette lidingar (som vondt i halsen, hoste, hovudverk) – som mange plantepreparat er funne lindrande mot eller kan førebyggje eller vere styrkjande middel mot og rundt – må ein vere varsam. I fall symptoma held seg trass i sjølvhjelpa eller om tilstanden blir akutt – med t.d. høg feber eller alvorlege smerter, skal ein straks søkje legehjelp [Sjå Thomson, s 17].

(4) Ukjent for mange kan det tenkjast at naturmedisinsk sjølvhjelp blir til sakte plage dersom symptom blir kunnig lindra eller mildare ved naturlege middel si hjelp, slik at dette kjem i vegen for eller "kolliderer med" (interferer med) korrekt medisinsk diagnose ved at ein ikkje verkar så dårleg som ein vel kan tenkjast å vere under overflatelindringar. Bruk av alternative middel må ikkje føre til svekka medisinsk diagnose og dårlegare medisinsk handsaming. Bruker ein alternative middel og går til lege for sjekking og behandling, får ein opplyse om kva ein nyttar - som trygging. Det er best.

(5) Synergieffektar (samvirkeverknader): Somme plantar går godt saman, mens andre kanskje ikkje går fullgodt i spann med kvarandre eller medisin. Når dette er sagt, hører det vel også med å nemne at utvalet her hører med blant dei jamt tryggaste, generelt sett. Det vil seie at dei fleste er ikkje farlege. Men ein skal altså kunne nok sjølv, nok til å ha det trygt med det ein held på med. Det er eigenansvaret.

Oversikt

1. For:

Blodstillande – Kjerringrokk, ryllik

Blodtrykkstabiliserande – Hagtorn, solblom, sitronmelisse

Galledrivande – Gulsøte, tusengylden, malurt, salvie

Hjertestyrkande – Hagtorn, kvitløk, sitronmelisse, solblom, ingefær, kajenne (Capsicum), fiskeolje og Omega-3

Hugs, minne (hukommelse) – Blåbær, ginseng, russisk rot, eggegule (har lecitin)

Overskott – Schizandra (Chisandra), Garcinia cambogia

Roande – Lavendel, humle, anis, vendelrot, sitronmelisse, lind

Styrkemiddel – Hagtorn, lind, nype, gulsøte (Gentiana lutea), salvie, augnetrøst

Sveitte-, vass-, urindrivande – Eine, bjørkesevje og bjørkebladskot, kjerringrokk, gullris, svarthyll, lind, løvetann

Urinvegane – Amerikansk dvergpalme, kveke, tranebær

2. Mot (Eit bra utval plager og middel)

Abortar (antiabortiv:) – Krossved

Akne – Lavendel, eukalyptusdropar

Aldersproblem – Ginseng, kvitløk, rosmarin, vendelrot, tempeltre (ginkgo biloba)

Aldring – Kveitekimolje, rosenrot (Rhodiola rosea), vitamin E, kvitløk, paprika, graskarkjerner, aloe vera

Allergi – Peparmynte, Scutellaria laterifolia (skullcap)

Anemi – Løvetann

Appetittmangel – Tusengylden, malurt, gulsøte, eine, humle, ryllik, timian

Artritt – Ingefærrot, raud pepar (capsicum), vassarv

Arteriosklerose – tempeltre (ginkgo biloba), kajenne, kvitløk

Astma – Tempeltre, svarthyll, rundsoldogg, smalkjempe, løk, lakrisrot, schizandra

Auga; såre, slitne, m.m. – Augnetrøst, kamilleblom, blåbær, fennikel, kjempe, eik, hylleblomstkompress, ringblom, trollhassel-augebad

Bekymring, sut – Rosenrot

Betennelse – Lakrisrot

Betennelse i munn og svelg – TIL TANNLEGE - Solblom, blåbær, salvie, lin, timian, kjempe, tepperot

Betennelse i slimhinner – Lin, kamilleblom

Blodfeitt (kolesterol m.m.) – Havrekli (for betre verdiar), kelp, eplepektin

"Blodfriskande" vår- og haustkurar – Løvetann, nesle, bjørk, svarthyll, gullris, trollhegg

Blodtrykk, høgt – Lavendelolje, muskatsalvie-esssens, kvitløk, hagtorn, misteltein, olivenblad, rauwolfia

Blodtrykk, lågt – Ginseng, rosmarin

Blærelidingar – Dvergpalmefrukter, tranebær, løvetann, løpstikke

Blære, urinvegvanskar – Dvergpalmefrukter, kjerringrokk, gullris, mjølbær, nype, kjempe, eine, bjørk (spede blad), bjørnebær

Blåmerke og støytar – Ringblom, solblom, virginiatrollhassel

Brannsår, mindre – Linolje, legestokkrose, tetre, tepperot, perikumolje, valurtomslag

Bronkitt – Eukalyptus, stemorsblom, karragen (tørka Chondrus crispus, dvs. E 407), kvitløk, meisterrot, raud solhatt (Echinacea purpurea), timian

Bulimi – Ingefærrot

Byllar – Apotekarrose (Rosa gallica "officinalis"), solhatt (Echinacea angustifolia), villkrysantem

Candidasyndromet – Raud solhatt

Crohns sjukdom – Peparmynte

Cøliaki – Kamilleblom

Depresjon, nedtrykt sinnsstemning – Perikum, humle, sjasmin, tempeltre, havre, ginseng, sitronmelisse, appelsinblomstolje

Diaré – Timian, tepperot, schizandra, (tørka) blåbær, solbær, bringebærblad, carob (Ceratonia siliqua; johannesbrødmjøl), Kanadisk gulsymre (Hydrastis canadensis)

Dårleg ande – Mynte (blad kan tyggjast), spisskummen (Cuminum cyminum), rosmarin

Eksem – Hundetunge, lin, ringblom, stemorsblom, brennesle med måte, lakrisrot, kamilleblom

Emfysem – TIL LEGE – tempeltre

Feber – Nype, lind, Andrographis paniculata i Kan Jang, hyll, klaseormedrue, ingefær, ryllik

Fordøyingsplager – mage- og tarmproblem – Malurt, gulsøte, karragen, salvie, peparmynte, karve, kamilleblom, fennikel, anis, kjerringrokk, sitronmelisse, perikum, lin, tepperot, ryllik, timian, tusengylden

Fordøyingssystemet – malabsorpsjon, funksjonssvikt – Kamilleblom, meisterurt, tusengylden, anis

Forkjøling – Raud solhatt, svarthyll, storblada lind, peparmynte, nype, marinøkleblom, basilikum, perikum, smalkjempe, ryllik, kvitløk, kvitpil

Forstopping – Trollhegg, lin, friske blåbær, sviskejuice, byggrot

Forstuvingar o.l. – Solblom, kjerringrokk, perikumolje

Galleplager – Tusengylden, malurt, sikori, løvetannrot, mariatistel, kveke, alfalfa, peparmynte, karve, perikum

Gastritis – Karragen

Gikt, revmatisme – Svarthyll, nesle, gurkemeierot (Curcuma longa), løvetann, solblom, eine, bjørk, lavendel, timian, perikum, hyll.

Hals, sår, øm – Kamilleblom, legestokkrose, salvie, lin

Hemoroidar – Kamilleblom, kjerringrokk, hamamelis, gåsemure, vassarv

Herpes – Raud solhatt, lakrisrot

Hovning, oppesing (hevelsar), blåmerke – Solblom, kjerringrokk

Hoste, bronkitt – Lakrisrot, fennikel, basilikum, smalkjempe, anis, stemorsblom, kjerringrokk, timian, marinøkleblom, kongslys, kamilleblom, isop, Apotekarrose, oregano, eukalyptus.

Hovudverk, migrene – Humle, lavendel, vendelrot, perikum, raud pepar, sitronmelisse, rosmarin

Hud; sprekker – Karragen

Hudplager, hudlidingar, eksem, kviser – Salvie, peparmynte, smalkjempe, blåbær (også -blad), kamilleblom, bjørk, stemorsblom, kjerringrokk, gullris, timian, eik, neslesaft,

Hudorm – Ringblom

Håravfall, flass – tempeltre, bjørk, stornesle, solblom

Hås røyst, hæse (å vere hås), lei hoste – Friske granskott – Santa sapina sirup

Immunsvekking – Svarthyll, spirulina, Raud solhatt, ginseng, kvitløk, misteltein

Influensa – Kvitløk, solhatt (Echinacea angustifolia), svarthyll, ryllik, kvitløk, peparmynteolje

Insektbitt – Sitronmelisse (avkok)

Innvolsorm – Strandmalurt

Kikhoste – Timian

Klimakterievanskar – kvitløk, klaseormedrue (Cimicifuga racemosa), ryllik, vendelrot

Kolikk-liknande trøbbel – Gåsemure

Konsentrasjonsvanskar – Vendelrot, melasse, ginseng, russisk rot

Krampe (mindre alvorleg) – TIL LEGE FØRST – Vendelrot, anis, kamilleblom, ryllik

Krinsløpet; slapt – rosmarin, russisk rot

Krinsløp-forstyrringar – Hagtorn, tempeltre, lavendel, rosmarin, kvitløk

Kvalme, brekningar – Ingefær, peparmynte, kanel (i visse tilfelle)

Kviser – Salvie, kvitløk, rose

Ledd og musklar – verning – Ingefærrot

Leverproblem – Peparmynte, gullris, vindrue

Likfingrar (Raynauds fenomen) – tempeltre, pepar (capsicum)

Magesekk-ugreie – Havregraut, havresuppe, poteter – [Akupunktur kan bli tilrådd, og kanskje rolegare livsførsel]

Mage: uroleg – Lavendel, peparmynte, tepperot

Magekrampar, tarmgass – Karve, fennikel, peparmynte, anis, kamilleblom, eine, timian, tepperot, kanadisk gulsymre (ÅTVARING: ikkje under svangerskapet)

Magesår (trugande) – TIL LEGE - Lakrisrot, kvitkål, kamilleblom

Menopausetrøbbel – Kvitløk, klaseormedrue (Cimicifuga racemosa), krossved, ryllik, vendelrot

Menstruasjonsplager – Perikum, ryllik, kamilleblom, dauvnesle

Migrene – Tempeltre (Gingko biloba)

Morsmjølk, lite – Karve

Munn- og tannkjøtproblem som periodontitt – TIL TANNLEGE – Raud solhatt

Muskelkrampe – Perikumolje, krossved

Muskelsmerte – Rosmarin

Nasekatarr – Kamilleblom, furu

Nervesmerter – Lavendel, havre, perikum

Nervøs utmatting – Ginseng, lavendel, rosmarin, vin (druesaft)

Nervøse plager – Anis, sitronmelisse, perikum, humle, lavendel, hagtornblomster, vendelrot, rosmarin

Nervøst hjertebry – Vendelrot

Nyrelidingar – Perikum, sommarhyll, løvetann,

Oppblåst – Yoghurt (pga. acidofilus-bakterien o.a.), kvitløk [Sjå gjerne tarmgass også]

Oppjaga – Lavendel, roseolje

Overgangsalderplager – Humle, soya, perikum, Melbrosia, kvitløk, klaseormedrue (Cimicifuga racemosa), marikåpe, ryllik, vendelrot

Overvekt – Kvit rododendron (Rhododendron caucasicum), CLA, [Garcinia cambogia frukt (Malabar tamarind) kan utprøvast],

PMS – Perikum, vendelrot, nattlysolje, lakrisrot

Prostatabesvær – Amerikansk dvergpalmefrukt (Serenoa repens), tranebær, nesle, graskarfrø

Psoriasis – Solhatt (Echinacea angustifolia), Raud pepar, sarsaparilla

Revmatisme – Salvie (ligamentverk), eine

Sengevæting, enureses – Legestokkrose, persille, havrestrå,

Sexlivet – slett – Schizandra, rosenrot, tempeltre, ginseng, russisk rot

Skrubbsår (grunne) – Perikum

Skrumplever – (VED SIA AV LEGEHANDSAMING:) nattlysolje (kan prøvast)

Sliten – Kryddernellik, perikum, schizandra, tempeltre, kajenne, russisk rot, Nomijuice

Solforbrenning – Perikumolje, aloe vera krem, olivenolje (førebyggjande mest), ringblomkrem, kjerringrokkte

Sorgtung, trist – perikum

Stoffskifteproblem (til stimulering:) – Eine, ginseng, nesle, russisk rot, løvetann, kjerringrokk (stoffskiftelidingar)

Stress – Sitronmelisse, schizandra, ginseng, verbena, geraniumolje

Strupekatarr – Hasselurt, Apotekarkattost, salvie

Svangerskapsubehag – Ingefær (mot kvalme), kanel (hjelper fordøyinga)

Sveitting – Salvie

Søvnløyse – Kamilleblom, sitronmelisse, lavendel, humle, vendelrot, lind

Sår – (for behandling av små sår:) – Ringblom, solhatt (Echinacea angustifolia), aloe vera, ryllik, kjempe, solblom, salvie, kjerringrokk, perikum, lin, timian, eik

Tannkjøtbetennelse (periodontitt) – TIL TANNLEGE – Blåbær, kamilleblom, solblom

Tannverk – TIL TANNLEGE – Kryddernellik

Tarmgass, flatulens – Kamilleblom, fennikel, karve, dill, sitronmelisse, peparmynte, anis, kanel, yoghurt (pga. acidofilus-bakterien o.a.)

Tjukktarmen, irritabel – Fennikel, vendelrot, peparmynte, kamilleblom

Tjukktarmen, kronisk betennelse (ulcerøs kolitt. (Ulcerøs: " karakterisert av sårdanning valda av sjukdom og ikkje ytre skade) – Aloe vera, peparmynte, kamilleblom

Tynntarmkatarr – Meisterrot

Toksinavgifting – Spirulina

Ufruktbar, infertil – Kvitløk, løk

Underlivsplager – Kamilleblom

Ødem – Dvergpalme, løvetannrot (tørka)

Årebetennelse – Valurt

Åreforkalking – Kvitløk, ramsløk

Åreknutar – Hamamelis, Virginiatrollhassel, hestekastanje.

Wikipedia inneheld mange fine opplysningar om plantar og urter frå lista ovafor, iallfall engelsk del. Den kan eg tilrå.

For å sjå kva ein viss plante er lista opp for og mot her på sida, trykk på kontrolltasten og f samtidig og fyll inn i søkeboksa som kjem fram – t.d. 'sitronmelisse', som har 11 oppføringar.

Dessutan: Liste over norske, latinske og engelske plantenamn kan somtid vere til hjelp òg. Prøv "løk" der og finn namna på raudløk, ramsløk, grasløk, kvitløk og strandløk på engelsk og latin, til dømes.