• Hanen og høna i nøtteskogen
• Hanen, gauken og orrhanen

Hanen og høna i nøtteskogen

Hanen og høna gjekk ein gong i nøtteskogen og skulle plukke nøtter.

Så fekk høna eit nøtteskal i halsen og låg og flaksa med vengene. Hanen skulle etter vatn til henne; så sprang han til kjelda og sa: "Kjære kjelde, gi meg vatn; vatn gir eg tuppa, høna mi; som ligg og dregst med døden i nøtteskogen."

Kjelda svara: "Du får ikkje vatn av meg før eg får lauv av deg." Så sprang hanen til linda: "Kjære lind, gi meg lauv; lauv gir eg kjelda, kjelda gir meg vatn, vatn gir eg tuppet, høna mi, som ligg og dregst med døden i nøtteskogen."

"Du får ikkje lauv av meg, før eg får raude gullband av deg," svara linda.

Så sprang hanen til jomfru Maria: "Kjære jomfru Maria, gi meg raude gullband; raude gullband gir eg linda, linda gir meg lauv, lauv gir eg kjelda, kjelda gir meg vatn, vatn gir eg tuppa, høna mi, som ligg og dregst med døden i nøtteskogen."

"Du får ikkje raude gullband av meg før eg får sko av deg," svara jomfru Maria.

Maria med typisk blå kappe i ein rosehage. Frå måleri ladda med gammal Maria-symbolisme, "Garden of Paradise", måla ca. 1410 av Paradishagens Meister. Lite utsnitt.

Så sprang hanen til skomakaren: "Kjære skomakar, gi meg sko; sko gir eg jomfru Maria, jomfru Maria gir meg raude gullband, raude gullband gir eg linda, linda gir meg lauv, lauv gir eg kjelda, kjelda gir meg vatn, vatn gir eg tuppa, høna mi, som ligg og dregst med døden i nøtteskogen."

"Du får ikkje sko av meg før eg får bust av deg," svara skomakaren.

Så sprang hanen til purka: "Kjære purke, gi meg bust; bust gir eg skomakaren, skomakaren gir meg sko, sko gir eg jomfru Maria, jomfru Maria gir meg raude gullband, raude gullband gir eg linda, linda gir meg lauv, lauv gir eg kjelda, kjelda gir meg vatn, vatn gir eg tuppa, høna mi, som ligg og dregst med døden nøtteskogen."

"Du får ikkje bust av meg før eg får korn av deg," svara purka. Så sprang hanen til treskjemannen: "Kjære treskjemann, gi meg korn; korn gir eg purka, purka gir meg bust, bust gir eg skomakaren, skomakaren gir meg sko, sko gir eg jomfru Maria, jomfru Maria gir meg raude gullband, raude gullband gir eg linda, linda gir meg lauv, lauv gir eg kjelda, kjelda gir meg vatn, vatn gir eg tuppa, høna mi, som ligg og dregst med døden i nøtteskogen."

"Du får ikkje korn av meg før eg får lefse av deg," svara treskjemannen.

Så sprang hanen til bakstekjerringa: "Kjære bakstekjerringa mi, gi meg lefse; lefse gir eg treskjemannen, treskjemannen gir meg korn, korn gir eg purka, purka gir meg bust, bust gir eg skomakaren, skomakaren gir meg sko, sko gir eg jomfru Maria, jomfru Maria gir meg raude gullband, raude gullband gir eg linda, linda gir meg lauv, lauv gir eg kjelda, kjelda gir meg vatn, vatn gir eg tuppa, høna mi, som ligg og dregst med døden i nøtteskogen."

"Du får ikkje lefse av meg før eg får ved av deg," svara bakstekjerringa.

Så sprang hanen til vedhoggaren: "Kjære vedhoggar, gi meg ved; ved gir eg bakstekjerringa, bakstekjerringa gir meg lefse, lefse gir eg treskjemannen, treskjemannen gir meg korn, korn gir eg purka, purka gir meg bust, bust gir eg skomakaren, skomakaren gir meg sko, sko gir eg jomfru Maria, jomfru Maria gir meg raude gullband, raude gullband gir eg linda, linda gir meg lauv, lauv gir eg kjelda, kjelda gir meg vatn, vatn gir eg tuppa, høna mi, som ligg og dregst med døden i nøtteskogen."

"Du får ikkje ved av meg før eg får øks av deg," sa vedhoggaren.

Så sprang hanen til smeden: "Kjære smed, gi meg øks; øks gir eg vedhoggaren, vedhoggaren gir meg ved, ved gir eg bakstekjerringa, bakstekjerringa gir meg lefse, lefse gir eg treskjemannen, treskjemannen gir meg korn, korn gir eg purka, purka gir meg bust, bust gir eg skomakaren, skomakaren gir meg sko, sko gir eg jomfru Maria, jomfru Maria gir meg raude gullband, raude gullband gir eg linda, linda gir meg lauv, lauv gir eg kjelda, kjelda gir meg vatn, vatn gir eg tuppa, høna mi, som ligg for døden i nøtteskogen."

"Du får ikkje øks av meg før eg får kol av deg," sa smeden.

Så sprang hanen til kolbrennaren: "Kjære kolbrennar, gi meg kol; kol gir eg smeden, smeden gir meg øks, øks gir eg vedhoggaren, vedhoggaren gir meg ved, ved gir eg bakstekjerringa, bakstekjerringa gir meg lefse, lefse gir eg treskjemannen, treskjemannen gir meg korn, korn gir eg purka, purka gir meg bust, bust gir eg skomakaren, skomakaren gir meg sko, sko gir eg jomfru Maria, jomfru Maria gir meg raude gullband, raude gullband gir eg linda, linda gir meg lauv, lauv gir eg kjelda, kjelda gir meg vatn, vatn gir eg tuppa, høna mi, som ligg for døden i nøtteskogen."

Så syntest kolbrennaren synd i hanen og gav han kol. Så fekk smeden kol, og vedhoggaren øks, og bakstekjerringa ved, og treskjemannen lefse, og purka korn, og skomakaren bust, og jomfru Maria sko, og linda gullband, og kjelda lauv, og hanen vatn, og det gav han til tuppa, høna si, som låg for døden i nøtteskogen; så blei ho god att.

Hanen, gauken og orrhannen

Så vakna hanen -

Hanen, gauken og orrhanen hadde ein gong kjøpt ku saman. Då det ikkje var råd å dele den og dei ikkje kunne bli forlikte om å løyse kvarandre ut, blei dei einige om at den som vakna først om morgonen, skulle ha kua. Så vakna hanen først.

"No er kua mi! No er kua mi!" sa hanen.

Då hanen gol, vakna gauken.

"Halv ku! Halv ku!" sa gauken.

Då han gol, vakna orrhanen.

"Kjære brør, del som er rett og skil, rett og skil! Tsio, tsi!" sa orrhanen.

Kan du så seie meg kven som burde ha kua?